La viaja en elefen ON

LA VIAJA

par Katherine Mansfield

Zeland Nova (1888 – 1923)

Traduida a elefen (ON) par Harri Savolainen

La barkon de Picton va parti a des-un e un dui. La note es bela, temperada, stelosa, an tal kwando los sorti la taksi e komensa vade a su sur la Doka Vea kwal protende a via a la porto, un venta kwieta movente de la akwa fronsida su la chapo de Fenella, e la chika leva sua mano a la chapo per manteni lo. En la Doka Vea lo es oskur, multe oskur; la kabanas de lana, la kamiones de boves, la grus kwal sta tan alta, un lokomotiva peti e trunkin, tota kosas pare es taliada a via par la oskuria solida. Así e alá sur un pila ronda de lenio, kwal es komo la tronketa de un champinion, negra e jigante, alá un lampa es pendeda, ma esta pare komo lo teme desenrola sua lus timida tremante a tota akel negria; lo arde mol, komo per se mesma.

La padre de Fenella presa per avansa kon paseas rapida e nervosa. A sua lado la ava de Fenella luta a longo en sua jakon asustante negra; los vade tan rapida ke Fenella debe aora e alora fa un salteta nondiniosa per manteni se kon los. Komo anke sua bagaje bandada a un salsich ordinada, Fenella porta la para-pluve de sua ava, fisada a el mesma, e la maniko, kwal es la kolo de un sinie, dona kontinuante pikas peti agu a la spala de la chika, komo lo ta vole ke el freta. Omes, kon sua chapetas traeda a su, kon sua kolares turnada a supra, penduli; alga femes, tota de los amortida, freta entre los; e un chiko peti, videda sola par sua brasos peti negra kwal mostra se de su un chal de lana blanka, es koler arankada a ante, entre sua padre e madre; el pare komo un bebe de moska ki ia kade en krema.

Alora, subita, tan subita ke Fenella e sua ava ambos salta, de pos la kabana de lana la plus grande on oia Miao-u-u-u-U-U! On vide anke un trasa de fuma kwal pende a supra.

"La denunsia prima", la padre dise korta, e a esta momento los pote vide la barkon de Picton. Situada a lado de doka, tota kadenida, tota ensirkada par lampas ronda kon lus de oro, la barkon de Picton pare komo si lo ta es plu pronto per naviga entre la stelas ka sur la mar fria.

Umanas freta a longo la planke de embarka. La ava es la prima ki vade, alora vade la padre, alora Fenella. Los ave un paso alta a su sur la nivel de barkon, e un marinor vea en sweter, stante prosima, dona sua mano, seka e dur, a Fenella. Aora los es alá; los pasea a via de umanas fretante, e kwando los sta su un skalera peti de fero kwal gida a la nivel alta, los komensa dise adio.

"Alá, mama, tua bagaje es alá!" la padre de Fenella dise, donante un otra salsich bandida a la ava.

"Grasias, Frank."

"E tu ave la biletas de la kabina en sekuria?"

"Si, mea kara."

"E la otra biletas?"

La ava sensa per los en sua ganto e mostra la apikos a el.

"Si, koreta."

La padre sona sever, ma Fenella, ki regarda zelosa el, vide ke sua padre pare fatiga e triste. Miao-u-u-u-U-U! La denunsia du ruido supra la testas, e un vos komo un plora kria: "Alga plu per la planke de embarka?"

"Tu va dona mea ama a papa!", Fenella vide la labios de sua padre dise. E la ava responde multe ajitada: "Natural, me va fa lo, mea kara. Vade aora, tu debe parti! Vade aora, Frank! Vade aora!"

"Oke, mama. Me ave tre minutos plu." Per sua surprende Fenella vide ke la padre prende la chapo a su, juntante la ava a se. "Ta ke Dio bondise tu, mama!", Fenella oia.

E la ava pone sua mano, kon la ganto de filos negra kwal es a tra gastada sirka la dito de anelo, kontra la jena de sua fio, e el sanglota: "Ta ke Dio bondise tu, mea propre fio korajosa!"

Esta es tan asustante ke Fenella turna sua dorso a los, engoli un ves, du ves, e grima asustante a un stela peti verde sur la kulmina de un masto. Ma el debe turna se denova, kar sua padre va vade.

"Adio, Fenella. Es un chika bon!", La mustach, fria e moia, de la padre brosi la jena de Fenella. Ma Fenella saisi la suprapones de la jakon de el.

"Komo longa me va permane?" la fia chucha ansiosa. La padre no vole vide el. El sekute jentil la fia a via e dise: "Nos va vide lo. Así! Do es tua mano?" El presa alga kosa en la palma de Fenella. "Alá es un chiling per kaso."

Un chiling! El va serta vade a via per sempre! "Papa!", Fenella kria. Ma la om es ja a via, komo la ultima, ki ia lasa la barkon. La marinores pone sua spalas a la planke de embarka. Un enrola enorme de korda negra move volente tra la aira e kade "dump!" sur la doka. Un kampana sona, un denunsia chilia. Silente la doka negra komensa fuji, liska, borda a via de los. Aora los vide akwa krasente a entre. Fenella tensa per vide kon sua tota potia. "Eske padre es la person turnante se?" - "o salutante?" - "o stante sola?" - "o vadente nonakompaniada a via?" La banda de akwa kreske plu larga, plu oskur. Aora la barkon de Picton komensa pivote stable, indikante a la mar. Lo es futil regarda plu. La sola kosas videda es la poka puntos de lus e la fas de la orolojo de la site, e alga plu puntos de lus sur la montes oskura.

La venta freskinte aranka la faldas de Fenella; el vade a retro a sua ava. A lejeri de Fenella, sua ava pare no ankora triste. La fem ia pone la du salsiches de bagaje sur lunlotra, e es aora sentante sur los, la manos krusada, sua testa piko a un lado. El ave un regarda, intendosa e luminosa, sur sua fas. Alora Fenella vide ke la labios de la fem move, e el pensa ke la ava es preante. La fem vea dona un inklina luminosa kon sua testa komo per dise ke la prea es kwasi pronto. La fem dejunta sua manos, suspira, krusa los denova, kurvida a ante, e a fini dona se un sekute kuieta.

"E aora, enfante," el dise ditinte la kordas de sua kapeta, "me pensa ke nos debe regarda nosa kabinas. Resta prosima me, e pensa a no liska!"

"Si, ava!"

"E atende ke la para-pluves no es saisida par la reles de skalera. Me ia vide un para-pluve bela kwal ia rompe rapida a du en mea viaja así."

"Si, ava!"

Figures oskura de omes pigri kontra la reles. En la arde de sua pipas on vide un nas, o la apiko de un chapeta, o un duple de supra-sils parente stonada. 

Fenella regarda a supra. Alta en la aira, un figur peti, kon sua manos puchada en la poches de sua jaketa, sta regardante la mar. La barkon osila sempre piko, e la chika pensa ke anke la stelas osila. Aora un manejor pal en un jaka de lino, manteninte un platon en altia sur sua palma de mano, fa un paso a estra de un porte luminada, e pasa rapida los. Los vade tra la mesma porte. Atendente, a supra de la paso alta de lata a sur la tapeteta de kaucho, e alora a su un desende tan presipe ke la ava debe pone ambos pedes sur kada paso, e Fenella teni la rel umida e oblida tota diseda de la para-pluve kon la kolo de sinie.

A basa la ava sesa; Fenella teme peti ke la fem ta prea denova. Ma no, la ava sesa mera per tira a estra la biletas de kabina. Aora los es en la salon. Lo es briliante lusosa ma sofokante; la aira malodori de pinta, e osos de kosteletas ardeda, e kaucho. Fenella vole ke sua ava ta vade a ante, ma la fem vea no pote es fretada. Un sesto jigante kon sandwitches de jamon saisi sua oios. El vade a los e toka delikata un de los a alta kon sua dito.
”Kwanto kusta la sandwitches?” el demanda.
”Du-sentim!”, un manejor mas nonkortes kria batente a su un kotel e un forke.
La ava pote apena krede lo.
”Du sentimes per kada?” el demanda.
”Si”, dise la manejor e ginia a sua kamerada.

La ava mostra un grima peti, stonante. Alora el chucha apikal a Fenella: ”Tal malvole!”
E los naviga a via a la porte a plu ante, e longo un koredor kon kabinas a ambos lados. Un manejor fema, multe amable veni per enkontra los. El es vestida intera en blu, e sua kolar e mangas es fisada par botones grande de lata. Lo pare ke el konose bon la ava.
”Alo, seniora Crane”, el dise desklavinte la lavabo per los. ”Nos ave tu denova. Lo no es komun ke tu permete tu un kabina.”
”No,” dise la ava ”ma a esta ves lo es la pensosia de mea fio, kwal -”
”Me espera – ”, la manejor komensa. Alora el turna se e ave un regarda longa e lamentosa a la negria de la ava, e a la jaka e falda de Fenella, ambos negra, a sua blusa negra e la chapo kon un rosa de krepe.
La ava inklina sua testa. ”Lo ia es la vole de Dio”, el dise.
La manejor klui sua labios e, enspirante profonda, el pare krese parlante.
”Kwal me dise sempre es,” la fem dise, komo si lo ta es sua propre trova, ”plu temprana o plu tarda kada de nos debe vade a via, esta es serta.”  El pausa. ”Aora, eske vos vole ke me va trae alga kosa, seniora Crane? Un kopa de te? Kisa lo es aora nonusosa ofre alga kaldinte a vos?”
La ava turba sua testa. ”No kosa, grasias. Nos ave alga biskotos, e Fenella ave un multe bon banana.”
”Alora me va visita vos plu tarda”, la manejor fema dise e vade a via kluinte la porte.

La kabina es multe peti! Fenella senti komo kluida en un kacha kon sua ava. La oio ronda oskura supra la lavabo sintili stupida a los. Fenella senti timida. El sta kontra la porte, kontinuante teninte sua bagaje e para-pluve. Eske los va desvesti se así? La ava ia desapone ja sua kapeta, e enrolante la kordetas a supra, el fisa kada kordeta kon un ago a la fore ante ke el pende la kapeta a supra. Sua kapeles blanka brilia komo seda; la chinion peti a pos es kovreda par un rede negra. Fenella vide kwasi nunka sua ava kon la testa nonkovreda; la vea pare strana.
”Me va apone la fasinor de lana, kwal tua madre kara ia kroche a me”, dise la ava, e, desbandinte la salsich el tira a estra akel kosa, kwal el enrola sirka sua testa; la franje de borlas gris dansa a la supra-siles de la fem kwando esta surie mol e lamentosa a Fenella. Alora el lachi sua korseto e alga kosa su lo, e anke un otra kosa su esta. Alora alá pare es un luta, korta e agú, e la ava roja piko. Snip, snap, el ia abri la suportadores. El suspira de lejeri, e sentante sur la sofa de peluch, el desapone lenta e atendente sua botas kon lados elastika, e pone los a lado de lunlotra.  

Kwando Fenella ia desapone sua jakon e falda e ia apone sua roba de bani, la ava es intera pronto.
”Eske me debe desapone mea botas, ava? Los es liada.”
La ava dona a los un konsidera profonda. ”Tu va sensa multe plu komfortosa, si tu fa lo, enfante”, el dise. El besa Fenella. ”No oblida la preas. Nosa Senior kara es kon nos kwando nos es a mar, an plu multe ka kwando nos es a tera. E, kar me es un viajor esperiosa,” la ava dise enerjiosa, ”me va okupa la leteta superior.”
”Ma, ava, komo - an pos tota - tu ateni lo?”
Tre pasos peti, komo de los un arania, es la sola kwal Fenella vide. La fem vea dona un rie peti kuieta ante ke el asende la pasos en un modo ajil, e el egali la leteta supra la chika stonada.
”Tu no ia krede ke tua ava ta pote fa lo, si?” el dise. E kwando el afonda a retro, Fenella oia denova un rie lejera.
La kwadro dur de sapon gris no vole spuma, e la akwa en la botela es komo jelatin blu. Komo difisil lo es anke turna akel telones rijida a su; on debe simple rompe sua via a en. Si tota kosas ta es diferente, Fenella ta pote es rietosa…. Final el es a en, e kwando el reklina alá respirante rapida, el oia de supra un chucha, longa e mol, komo si algun es chuchante entre teletas de paper afin trova alga kosa. Lo es la ava ki prea.

Un tempo longa pasa.  Alora la manejor entra; el pasea mol e apoia sua mano sur la leteta de la ava.
”Nos es aora entrante la Stretas”, el dise.
”O!”
”La note es eselente ma nos es alga vakwa. Lo es posible ke nos va osila piko.”
E vera, en esta momento la barkon de Picton alti e alti e pende en la aira esata sufisinte longa per dona un trema ante ke lo es lansada a su a retro. On pote oia la sona de akwa pesosa kwal kolpa la lados de la barkon. Fenella rekorda ke el ia lasa la para-pluve kon la kolo de sinie sta sur un sofa peti. Si lo ta kade, eske lo ta es rompeda? Ma anke la ava rekorda lo simultan.
”Me demanda me, eske tu vole pone mea para-pluve sur la solo, manejor”, el chucha.
”Kon plaser, sra Crane.” E la manejor, reveninte a la ava, chucha: ”Tua neta peti dormi tan bela.”
”Dio ta es lodada!”, la ava dise.
”Enfante nonfortunosa sin madre!” dise la manejor, e la ava es ankora narante a el tota la avenida kwando Fenella adormi.

 ”An tal Fenella no ia dormi sufisinte longa per sonia ante kwando el revelia vidente ke alga kosa penduli en la aira supra sua testa. Kwal es lo? Kwal lo pote es? Lo es un pede peti, gris. Aora un otra junta a lo. Los pare cherka alga kosa; aora veni un suspira.
”Me es veliada, ava”, Fenella dise.
”O, la kara, me es prosima de la skala?” la ava demanda. ”Me pensa ke lo es en esta fini.”
”No, ava, en la otra fini. Me pone tua pede sur lo. Eske nos es alá?” Fenella demanda.
”En la porto,” la ava dise. ”Nos debe vesti nos, enfante. Kome un biskoto afin stabli tu ante tu move!”
Ma Fenella ia salta ja de sua leteta. La lampa es ankora ardente, ma la note es finida, e lo es fria. Regardante tra la oio ronda Fenella pote vide alga rokas distante. Aora los es sperdeda a supra kon spuma; aora un gavota pasa volante; e aora veni un peso longa de tera real.
”Lo es tera, ava”, Fenella dise, merveliante komo si los ia es a mar en semanas en junta. El abrasa se mesma; el sta sur un gama e frika lo kon la ditos de la otra pede; el es tremante. O! Tota kosas ia es tan triste resente. Eske esta va kambia? Ma la sola kwal la ava dise, es ”Freta, enfante, me ta debe dona tua banana bela a la manejor, kar tu no ia kome lo.” E Fenella apone denova sua vestes negra, e un boton salta a via de un ganto de la chika, rolante a un plaso a do Fenella no ateni. Los vade a la nivel.

Si lo ia es fria en la kabina, sur la nivel lo es jelin. La sol es ankora no a supra, ma la stelas es oskur, e la sielo, fria e blankin, ave la mesma kolor komo la mar, fria e blankin. A tera un nebla blanka asende e desende. Aora los pote vide intera klar alga arboreta oskur. An la formas de la filisis para-pluvin es mostrada, e akel arbores arjentin, strana pliada, kwal pare komo skeletos…
Aora los pote vide la stadio de atera e alga kasas peti, anke blankin, grupida a junta, komo sur la kovre de un kacha. La otra viajores pasea a supra e su, ma plu lente ka los ia fa en la note ante aora, e los pare sombre.
Aora la stadio de atera veni a los. Lente lo flota kontra la barkon Picton, e alá veni anke un om tenante un enrola de kordon, e un karo kon un kavalo, peti e pendente, e un otra om sentante sur la paso.
”Lo es Senior Penreddy, Fenella, el ia veni per nos”, dise la ava. El sona plaseda. Sua jenas sirin es blu de fria, sua mento trema, e el debe frota kontinuante sua oios e sua nas peti ros.
”Tu ave mea –”
”Si, ava.” Fenella mostra lo a el.
La kordon veni volante tra la aira, e ”smak” lo kade sur la nivel. La planke de embarka deveni basida. Alora Fenella segue sua ava a la doka e sur la karo peti, e pos un momento los es rolante a via. La ungulas de la kavalo peti tamburi sur la pila de lenio, alora los afonda mol a la via arenosa. No un person es videda; an no indika de fuma. La nebla asende e desende, e la mar sona ankora komo dorminte, tan lente lo turna a la plaia.

”Me ya vid’ Sr Crane yir”, Sr Penreddy dise. ”El ya par’ kom’ mesma alor’. S’nyora ya bat’ un grup’ de skon’s en la seman’ pres’dent’.”
E aora la kavalo peti es retirada ante un de la kasas konkin. Los desmonta la karo. Fenella pone sua mano sur la porte, e la gotas de nebla, grande e tremante, moia intera la puntos de ganto de Fenella. Los vade a supra longo un rueta de kalkulos ronda, blanka, kon flores moiada dorminte a ambos lados. La pikotés blanka e delikata de la ava es tan pesosa de nebla, ke los es pendente, ma sua bon odor dulse es un parte de la matina fria. La blindas es a su en la kasa peti; la ava e la neta asende la pasos a sur la veranda. Un duple de botas vea de kaucho sta sur un lado de la porte, e un grande bote roja de akwa sur la otra lado.
”Tut, tut, tua avo”, la ava dise. El turna la maniko.  No un sona. El klama ”Walter!”. E sin retarda un vose profonda kwal sona dui sofoka, klama a retro: ”Akel es tu, Mary?”
”Para, mea kara!”, la ava dise. ”Entra.” El puia mol Fenella en un salon peti oskur.
Sur la table un gato, ki ia plia se parente un dromedario, leva, estende se, miaui, e alora salta sur la puntos de sua ditos de pede. Fenella entera un peti mano fria en la pelo blanka, kalda, e surie timida en kwando el karesa e eskuta la vose mol de la ava e la sonas rolante de la avo.
Un porte kruji. ”Entra, mea kara.” La fem vea jesti, Fenella segue. Alá sur un lado de un leto jigante la avo reklina. Sola sua testa kon un mecha blanka e la fas rosin e la barba longa arjentin es mostrada supra la kovre-leto. El es komo un avia multe vea ma atendente.
”Aora, mea chika,” la avo dise, ”Dona nos un besa!” Fenella besa la om. ”Uh!” la avo dise. ”Sua nas peti es tan fria komo un boton. Kwal kosa el es teninte? La para-pluve de sua ava?”
Fenella surie denova e pende la kolo de sinie sur la rel de leto. Supra la leto es mostrada un testo grande en un moldur negra:

Perdeda! Un Ora De Oro
Kolie De Sesdes Minutos Diamantin.
No Rekompensa Es Ofreda
Kar Los Es A VIA PER SEMPRE!

”Tua avo ia pinti akel”, la avo dise. El fronsi sua mecha blanka e regarda Fenella tan joiosa ke esta pensa kwasi ke la om ginia a el.