La viaja en OF

LA VIAJA

par Katherine Mansfield

Zeland Nova (1888 – 1923)

Traduida a elefen (ortografia fonetical) par Harri Savolainen

La barcon de Picton va parti a des-un e un dui. La note es bela, temperada, stelosa, an tal cwando los sorti la taxi e comensa vade a su sur la Doca Vea cwal protende a via a la porto, un venta cwieta movente de la acwa fronsida su la xapo de Fenella, e la xica leva sua mano a la xapo per manteni lo. En la Doca Vea lo es oscur, multe oscur; la cabanas de lana, la camiones de boves, la grus cwal sta tan alta, un locomotiva peti e truncin, tota cosas pare es taliada a via par la oscuria solida. Así e alá sur un pila ronda de lenio, cwal es como la tronceta de un xampinion, negra e jigante, alá un lampa es pendeda, ma esta pare como lo teme desenrola sua lus timida tremante a tota acel negria; lo arde mol, como per se mesma.

La padre de Fenella presa per avansa con paseas rapida e nervosa. A sua lado la ava de Fenella luta a longo en sua jacon asustante negra; los vade tan rapida ce Fenella debe aora e alora fa un salteta nondiniosa per manteni se con los. Como ance sua bagaje bandada a un salsix ordinada, Fenella porta la para-pluve de sua ava, fisada a el mesma, e la manico, cwal es la colo de un sinie, dona continuante picas peti agu a la spala de la xica, como lo ta vole ce el freta. Omes, con sua xapetas traeda a su, con sua colares turnada a supra, penduli; alga femes, tota de los amortida, freta entre los; e un xico peti, videda sola par sua brasos peti negra cwal mostra se de su un xal de lana blanca, es coler arancada a ante, entre sua padre e madre; el pare como un bebe de mosca ci ia cade en crema.

Alora, subita, tan subita ce Fenella e sua ava ambos salta, de pos la cabana de lana la plus grande on oya Miao-u-u-u-U-U! On vide ance un trasa de fuma cwal pende a supra.

"La denunsia prima", la padre dise corta, e a esta momento los pote vide la barcon de Picton. Situada a lado de doca, tota cadenida, tota ensircada par lampas ronda con lus de oro, la barcon de Picton pare como si lo ta es plu pronto per naviga entre la stelas ca sur la mar fria.

Umanas freta a longo la plance de embarca. La ava es la prima ci vade, alora vade la padre, alora Fenella. Los ave un paso alta a su sur la nivel de barcon, e un marinor vea en sweter, stante prosima, dona sua mano, seca e dur, a Fenella. Aora los es alá; los pasea a via de umanas fretante, e cwando los sta su un scalera peti de fero cwal gida a la nivel alta, los comensa dise adio.

"Alá, mama, tua bagaje es alá!" la padre de Fenella dise, donante un otra salsix bandida a la ava.

"Grasias, Franc."

"E tu ave la biletas de la cabina en securia?"

"Si, mea cara."

"E la otra biletas?"

La ava sensa per los en sua ganto e mostra la apicos a el.

"Si, coreta."

La padre sona sever, ma Fenella, ci regarda zelosa el, vide ce sua padre pare fatiga e triste. Miao-u-u-u-U-U! La denunsia du ruido supra la testas, e un vos como un plora cria: "Alga plu per la plance de embarca?"

"Tu va dona mea ama a papa!", Fenella vide la labios de sua padre dise. E la ava responde multe ajitada: "Natural, me va fa lo, mea cara. Vade aora, tu debe parti! Vade aora, Franc! Vade aora!"

"Oce, mama. Me ave tre minutos plu." Per sua surprende Fenella vide ce la padre prende la xapo a su, juntante la ava a se. "Ta ce Dio bondise tu, mama!", Fenella oya.

E la ava pone sua mano, con la ganto de filos negra cwal es a tra gastada sirca la dito de anelo, contra la jena de sua fio, e el sanglota: "Ta ce Dio bondise tu, mea propre fio corajosa!"

Esta es tan asustante ce Fenella turna sua dorso a los, engoli un ves, du ves, e grima asustante a un stela peti verde sur la culmina de un masto. Ma el debe turna se denova, car sua padre va vade.

"Adio, Fenella. Es un xica bon!", La mustax, fria e moya, de la padre brosi la jena de Fenella. Ma Fenella saisi la suprapones de la jacon de el.

"Como longa me va permane?" la fia xuxa ansiosa. La padre no vole vide el. El secute jentil la fia a via e dise: "Nos va vide lo. Así! Do es tua mano?" El presa alga cosa en la palma de Fenella. "Alá es un xiling per caso."

Un xiling! El va serta vade a via per sempre! "Papa!", Fenella cria. Ma la om es ja a via, como la ultima, ci ia lasa la barcon. La marinores pone sua spalas a la plance de embarca. Un enrola enorme de corda negra move volente tra la aira e cade "dump!" sur la doca. Un campana sona, un denunsia xilia. Silente la doca negra comensa fuji, lisca, borda a via de los. Aora los vide acwa crasente a entre. Fenella tensa per vide con sua tota potia. "Esce padre es la person turnante se?" - "o salutante?" - "o stante sola?" - "o vadente nonacompaniada a via?" La banda de acwa cresce plu larga, plu oscur. Aora la barcon de Picton comensa pivote stable, indicante a la mar. Lo es futil regarda plu. La sola cosas videda es la poca puntos de lus e la fas de la orolojo de la site, e alga plu puntos de lus sur la montes oscura.

La venta frescinte aranca la faldas de Fenella; el vade a retro a sua ava. A lejeri de Fenella, sua ava pare no ancora triste. La fem ia pone la du salsixes de bagaje sur lunlotra, e es aora sentante sur los, la manos crusada, sua testa pico a un lado. El ave un regarda, intendosa e luminosa, sur sua fas. Alora Fenella vide ce la labios de la fem move, e el pensa ce la ava es preante. La fem vea dona un inclina luminosa con sua testa como per dise ce la prea es cwasi pronto. La fem dejunta sua manos, suspira, crusa los denova, curvida a ante, e a fini dona se un secute cwieta.

"E aora, enfante," el dise ditinte la cordas de sua capeta, "me pensa ce nos debe regarda nosa cabinas. Resta prosima me, e pensa a no lisca!"

"Si, ava!"

"E atende ce la para-pluves no es saisida par la reles de scalera. Me ia vide un para-pluve bela cwal ia rompe rapida a du en mea viaja así."

"Si, ava!"

Figures oscura de omes pigri contra la reles. En la arde de sua pipas on vide un nas, o la apico de un xapeta, o un duple de supra-sils parente stonada. 

Fenella regarda a supra. Alta en la aira, un figur peti, con sua manos puxada en la poxes de sua jaceta, sta regardante la mar. La barcon osila sempre pico, e la xica pensa ce ance la stelas osila. Aora un manejor pal en un jaca de lino, manteninte un platon en altia sur sua palma de mano, fa un paso a estra de un porte luminada, e pasa rapida los. Los vade tra la mesma porte. Atendente, a supra de la paso alta de lata a sur la tapeteta de cauxo, e alora a su un desende tan presipe ce la ava debe pone ambos pedes sur cada paso, e Fenella teni la rel umida e oblida tota diseda de la para-pluve con la colo de sinie.

A basa la ava sesa; Fenella teme peti ce la fem ta prea denova. Ma no, la ava sesa mera per tira a estra la biletas de cabina. Aora los es en la salon. Lo es briliante lusosa ma sofocante; la aira malodori de pinta, e osos de costeletas ardeda, e cauxo. Fenella vole ce sua ava ta vade a ante, ma la fem vea no pote es fretada. Un sesto jigante con sandwitxes de jamon saisi sua oyos. El vade a los e toca delicata un de los a alta con sua dito.
”Cwanto custa la sandwitxes?” el demanda.
”Du-sentim!”, un manejor mas noncortes cria batente a su un cotel e un force.
La ava pote apena crede lo.
”Du sentimes per cada?” el demanda.
”Si”, dise la manejor e ginia a sua camerada.

La ava mostra un grima peti, stonante. Alora el xuxa apical a Fenella: ”Tal malvole!”
E los naviga a via a la porte a plu ante, e longo un coredor con cabinas a ambos lados. Un manejor fema, multe amable veni per encontra los. El es vestida intera en blu, e sua colar e mangas es fisada par botones grande de lata. Lo pare ce el conose bon la ava.
”Alo, seniora Crane”, el dise desclavinte la lavabo per los. ”Nos ave tu denova. Lo no es comun ce tu permete tu un cabina.”
”No,” dise la ava ”ma a esta ves lo es la pensosia de mea fio, cwal -”
”Me espera – ”, la manejor comensa. Alora el turna se e ave un regarda longa e lamentosa a la negria de la ava, e a la jaca e falda de Fenella, ambos negra, a sua blusa negra e la xapo con un rosa de crepe.
La ava inclina sua testa. ”Lo ia es la vole de Dio”, el dise.
La manejor clui sua labios e, enspirante profonda, el pare crese parlante.
”Cwal me dise sempre es,” la fem dise, como si lo ta es sua propre trova, ”plu temprana o plu tarda cada de nos debe vade a via, esta es serta.”  El pausa. ”Aora, esce vos vole ce me va trae alga cosa, seniora Crane? Un copa de te? Cisa lo es aora nonusosa ofre alga caldinte a vos?”
La ava turba sua testa. ”No cosa, grasias. Nos ave alga biscotos, e Fenella ave un multe bon banana.”
”Alora me va visita vos plu tarda”, la manejor fema dise e vade a via cluinte la porte.

La cabina es multe peti! Fenella senti como cluida en un caxa con sua ava. La oyo ronda oscura supra la lavabo sintili stupida a los. Fenella senti timida. El sta contra la porte, continuante teninte sua bagaje e para-pluve. Esce los va desvesti se así? La ava ia desapone ja sua capeta, e enrolante la cordetas a supra, el fisa cada cordeta con un ago a la fore ante ce el pende la capeta a supra. Sua capeles blanca brilia como seda; la xinion peti a pos es covreda par un rede negra. Fenella vide cwasi nunca sua ava con la testa noncovreda; la vea pare strana.
”Me va apone la fasinor de lana, cwal tua madre cara ia croxe a me”, dise la ava, e, desbandinte la salsix el tira a estra acel cosa, cwal el enrola sirca sua testa; la franje de borlas gris dansa a la supra-siles de la fem cwando esta surie mol e lamentosa a Fenella. Alora el laxi sua corseto e alga cosa su lo, e ance un otra cosa su esta. Alora alá pare es un luta, corta e agú, e la ava roja pico. Snip, snap, el ia abri la suportadores. El suspira de lejeri, e sentante sur la sofa de pelux, el desapone lenta e atendente sua botas con lados elastica, e pone los a lado de lunlotra.  

Cwando Fenella ia desapone sua jacon e falda e ia apone sua roba de bani, la ava es intera pronto.
”Esce me debe desapone mea botas, ava? Los es liada.”
La ava dona a los un considera profonda. ”Tu va sensa multe plu comfortosa, si tu fa lo, enfante”, el dise. El besa Fenella. ”No oblida la preas. Nosa Senior cara es con nos cwando nos es a mar, an plu multe ca cwando nos es a tera. E, car me es un viajor esperiosa,” la ava dise enerjiosa, ”me va ocupa la leteta superior.”
”Ma, ava, como - an pos tota - tu ateni lo?”
Tre pasos peti, como de los un arania, es la sola cwal Fenella vide. La fem vea dona un rie peti cwieta ante ce el asende la pasos en un modo ajil, e el egali la leteta supra la xica stonada.
”Tu no ia crede ce tua ava ta pote fa lo, si?” el dise. E cwando el afonda a retro, Fenella oya denova un rie lejera.
La cwadro dur de sapon gris no vole spuma, e la acwa en la botela es como jelatin blu. Como difisil lo es ance turna acel telones rijida a su; on debe simple rompe sua via a en. Si tota cosas ta es diferente, Fenella ta pote es rietosa…. Final el es a en, e cwando el reclina alá respirante rapida, el oya de supra un xuxa, longa e mol, como si algun es xuxante entre teletas de paper afin trova alga cosa. Lo es la ava ci prea.

Un tempo longa pasa.  Alora la manejor entra; el pasea mol e apoya sua mano sur la leteta de la ava.
”Nos es aora entrante la Stretas”, el dise.
”O!”
”La note es eselente ma nos es alga vacwa. Lo es posible ce nos va osila pico.”
E vera, en esta momento la barcon de Picton alti e alti e pende en la aira esata sufisinte longa per dona un trema ante ce lo es lansada a su a retro. On pote oya la sona de acwa pesosa cwal colpa la lados de la barcon. Fenella recorda ce el ia lasa la para-pluve con la colo de sinie sta sur un sofa peti. Si lo ta cade, esce lo ta es rompeda? Ma ance la ava recorda lo simultan.
”Me demanda me, esce tu vole pone mea para-pluve sur la solo, manejor”, el xuxa.
”Con plaser, sra Crane.” E la manejor, reveninte a la ava, xuxa: ”Tua neta peti dormi tan bela.”
”Dio ta es lodada!”, la ava dise.
”Enfante nonfortunosa sin madre!” dise la manejor, e la ava es ancora narante a el tota la avenida cwando Fenella adormi.

 ”An tal Fenella no ia dormi sufisinte longa per sonia ante cwando el revelia vidente ce alga cosa penduli en la aira supra sua testa. Cwal es lo? Cwal lo pote es? Lo es un pede peti, gris. Aora un otra junta a lo. Los pare xerca alga cosa; aora veni un suspira.
”Me es veliada, ava”, Fenella dise.
”O, la cara, me es prosima de la scala?” la ava demanda. ”Me pensa ce lo es en esta fini.”
”No, ava, en la otra fini. Me pone tua pede sur lo. Esce nos es alá?” Fenella demanda.
”En la porto,” la ava dise. ”Nos debe vesti nos, enfante. Come un biscoto afin stabli tu ante tu move!”
Ma Fenella ia salta ja de sua leteta. La lampa es ancora ardente, ma la note es finida, e lo es fria. Regardante tra la oyo ronda Fenella pote vide alga rocas distante. Aora los es sperdeda a supra con spuma; aora un gavota pasa volante; e aora veni un peso longa de tera real.
”Lo es tera, ava”, Fenella dise, merveliante como si los ia es a mar en semanas en junta. El abrasa se mesma; el sta sur un gama e frica lo con la ditos de la otra pede; el es tremante. O! Tota cosas ia es tan triste resente. Esce esta va cambia? Ma la sola cwal la ava dise, es ”Freta, enfante, me ta debe dona tua banana bela a la manejor, car tu no ia come lo.” E Fenella apone denova sua vestes negra, e un boton salta a via de un ganto de la xica, rolante a un plaso a do Fenella no ateni. Los vade a la nivel.

Si lo ia es fria en la cabina, sur la nivel lo es jelin. La sol es ancora no a supra, ma la stelas es oscur, e la sielo, fria e blancin, ave la mesma color como la mar, fria e blancin. A tera un nebla blanca asende e desende. Aora los pote vide intera clar alga arboreta oscur. An la formas de la filisis para-pluvin es mostrada, e acel arbores arjentin, strana pliada, cwal pare como sceletos…
Aora los pote vide la stadio de atera e alga casas peti, ance blancin, grupida a junta, como sur la covre de un caxa. La otra viajores pasea a supra e su, ma plu lente ca los ia fa en la note ante aora, e los pare sombre.
Aora la stadio de atera veni a los. Lente lo flota contra la barcon Picton, e alá veni ance un om tenante un enrola de cordon, e un caro con un cavalo, peti e pendente, e un otra om sentante sur la paso.
”Lo es Senior Penreddy, Fenella, el ia veni per nos”, dise la ava. El sona plaseda. Sua jenas sirin es blu de fria, sua mento trema, e el debe frota continuante sua oyos e sua nas peti ros.
”Tu ave mea –”
”Si, ava.” Fenella mostra lo a el.
La cordon veni volante tra la aira, e ”smac” lo cade sur la nivel. La plance de embarca deveni basida. Alora Fenella segue sua ava a la doca e sur la caro peti, e pos un momento los es rolante a via. La ungulas de la cavalo peti tamburi sur la pila de lenio, alora los afonda mol a la via arenosa. No un person es videda; an no indica de fuma. La nebla asende e desende, e la mar sona ancora como dorminte, tan lente lo turna a la playa.

”Me ya vid’ Sr Crane yir”, Sr Penreddy dise. ”El ya par’ com’ mesma alor’. S’nyora ya bat’ un grup’ de scon’s en la seman’ pres’dent’.”
E aora la cavalo peti es retirada ante un de la casas concin. Los desmonta la caro. Fenella pone sua mano sur la porte, e la gotas de nebla, grande e tremante, moya intera la puntos de ganto de Fenella. Los vade a supra longo un rueta de calculos ronda, blanca, con flores moyada dorminte a ambos lados. La picotés blanca e delicata de la ava es tan pesosa de nebla, ce los es pendente, ma sua bon odor dulse es un parte de la matina fria. La blindas es a su en la casa peti; la ava e la neta asende la pasos a sur la veranda. Un duple de botas vea de cauxo sta sur un lado de la porte, e un grande bote roja de acwa sur la otra lado.
”Tut, tut, tua avo”, la ava dise. El turna la manico.  No un sona. El clama ”Walter!”. E sin retarda un vose profonda cwal sona dui sofoca, clama a retro: ”Acel es tu, Mary?”
”Para, mea cara!”, la ava dise. ”Entra.” El puya mol Fenella en un salon peti oscur.
Sur la table un gato, ci ia plia se parente un dromedario, leva, estende se, miauy, e alora salta sur la puntos de sua ditos de pede. Fenella entera un peti mano fria en la pelo blanca, calda, e surie timida en cwando el caresa e escuta la vose mol de la ava e la sonas rolante de la avo.
Un porte cruji. ”Entra, mea cara.” La fem vea jesti, Fenella segue. Alá sur un lado de un leto jigante la avo reclina. Sola sua testa con un mexa blanca e la fas rosin e la barba longa arjentin es mostrada supra la covre-leto. El es como un avia multe vea ma atendente.
”Aora, mea xica,” la avo dise, ”Dona nos un besa!” Fenella besa la om. ”Uh!” la avo dise. ”Sua nas peti es tan fria como un boton. Cwal cosa el es teninte? La para-pluve de sua ava?”
Fenella surie denova e pende la colo de sinie sur la rel de leto. Supra la leto es mostrada un testo grande en un moldur negra:

Perdeda! Un Ora De Oro
Colie De Sesdes Minutos Diamantin.
No Recompensa Es Ofreda
Car Los Es A VIA PER SEMPRE!

”Tua avo ia pinti acel”, la avo dise. El fronsi sua mexa blanca e regarda Fenella tan joyosa ce esta pensa cwasi ce la om ginia a el.